Xoşbəxtlik öz-özünə yarana bilməz təbii ki, xoşbəxt münasibətlər də həmçinin. Sağlam münasibət qurmaq üçün sevgi mütləqdir, ancaq bu işlər tək sevgi ilə də olmaz. Düşünülmüş jestlər, gözəl zaman keçirmək və bəzən bəzi şeyləri qurban vermək sağlam münasibətin əsas açarlarındandır. Güclü əlaqəni inkişaf etdirmək zaman və səy tələb edir. Münasibəti əbədi etmək üçün müsbət yanaşma mütləqdir.
Ətrafınızda gördüyünüz və ya içində olduğunuz gözəl münasibətlərə baxsanız görəcəksiniz ki, hər iki tərəf bir-birinə müsbət yanaşır, bunun üçün hər gün nələrsə edirlər. Onlar bu faktla razılaşırlar ki, münasibətin müntəzəm inkişafa ehtiyacı var. Bu məqaləmizdə sizə inamlı və əbədi münasibəti olan cütlüklərin 7 vərdişini təqdim edirik. 🙂
- Yalnız müsbətləri seçmək – Biz gündəlik həyatda mənfi hallarla da qarşılaşırıq. İşdəki problemlər, maddi çətinliklər, həmkarlarımızla mübahisələr və sair bu kimi hallar bizim emosiyalarımıza və sözsüz ki, münasibətimizə də öz təsirini göstərir. Xoşbəxt cütlüklər çətin günlərdə belə partnyorlarının müsbət keyfiyyətlərinə fokslanmağı bacarırlar. Nə qədər pərişan olsalar belə sevdikləri insan haqqında düşünüb neqativləri unuda bilirlər.
- Kiçik şeyləri qiymətləndirmək – Qiymətləndirmə hər bir sağlam münasibətin təməlini təşkil edir. Xoşbəxt cütlüklər sevgilərini və təşəkkürlərini qarşı tərəfə hər zaman bildirirlər. Onlar qarşı tərəfin hər hərəkətini qiymətləndirir, bu imkanı heç vaxt əldən vermirlər.
- Hər zaman əlaqə saxlamaq – Güclü münasibət quran şəxslərin daha bir sirri daimi əlaqədir. Onlar nə dərəcədə məşğul olmalarından asılı olmayaraq bir-birləri ilə əlaqə saxlayırlar. Ən məşğul gündə belə gözlənilməz kiçik mesaj, qeyd və ya zəng düşündüyünüzdən daha çox təsir edə bilər. Xoşbəxt cütlüklər məsafənin və gündəlik işlərin onların münasibətinə təsir etməsinə imkan vermirlər.
- Əsas məqsəd xoşbəxt olmaq – Sağlam münasibəti olan cütlüklər üçün xoşbəxt olmaq haqlı olmaqdan daha önəmlidir. Eqolarını sevgilərindən uzaq tutmağı bacarırlar. Bütün problemlərin həllində kompramisə gəlib, ortaq qərarı qəbul edirlər.
- Birlikdə yatmaq – Xoşbəxt cütlüklər bütün mübahisələri və çəkişmələri unudub, yatmazdan öncə bir-birlərinə sevgi sözlərini deyirlər. Neqativ emosiyalarını və qəzəblərini kənara qoyurlar. Kiçik bir sarılma və təbəssüm cütlük arasında qəzəbi tamamilə aradan qaldıra bilər.
- Səbrli olmaq və hörmət etmək – Heç kəs mükəmməl deyil. Hətta ən mükəmməl münasibət belə iki qeyri-mükəmməl insandan ibarət ola bilər. Və ya mükəmməl olmaq gözəl münasibətə sahib olmaq mənasına da gəlmir. Əlaqələrdə hər nə baş versə də, xoşbəxt cütlüklər bir-birlərinə hörmət etməyi qətiyyən unutmurlar.
Sizə sevgi dolu, xoşbəxt münasibət arzu edirik! Sevgilərlə, Bildirchin.az…
