Je t’aime… I love you… Te amo… Mən səni sevirəm… Bütün dillərdə bu ifadə sevgililər üçün həzin bir melodiya kimi səslənir. Bəs 311 dildə birdən olsa necə? Düzdü, səslənməsə də görünə bilər. Məhz bu sayda sevgi etirafı Parisin Monmartresində yerləşən sevgi divarında yazılıb.
Paris – hələ qədimdən sevgi, romantika şəhəri hesab olunur. Yüz illərlə Paris müxtəlif sevgi dramlarına, sevgililərin zəngin hekayələrinə şahidlik edib. Onun divarları ən xoş sözləri saxlamaqdadır.
Parisdə romantik guşələr saysız-hesabsızdır. Hər bir cütlük burada özünəməxsus bir yer tapa bilər, amma bütün cütlüklərin gəldiyi bir məkan var – Sevgi Divarı.
Bu maraqlı divarda göy fonda ağ yazılarla 311 dildə “Mən səni sevirəm” ifadəsi yazılıb. Hər kəs burada bu ifadəni öz doğma dilində tapa bilər. Hətta işarələr dilində yazılan “Mən səni sevirəm” yazısını da görmək olar. 40 kvadrat metrlik sevgi sözü. Sevgililərə 3 rəssamdan – Danielya Bulonya, Frederika Barona və Kler Kitodan hədiyyə olaraq verilib.
Sevgi Divarı hekayəsinin tarixi çoxdan başlayır. Frederik Baronun çox maraqlı bir hobbisi var idi, o “mən səni sevirəm” kəlməsini müxtəlif dillərdə kolleksiya edirdi. Harda olmasından asılı olmayaraq o, yerli sakinlərdən bu kəlməni onun bloknutuna yazmağı rica edirdi. Beləliklə, 10 il ərzində o, 300-dən çox dil və dialektdə bu kəlməni toplaya bildi. 1997-ci ildə isə Frederik Baron kalliqraf Kler Kito ilə rastlaşır. Elə o vaxt da Sevgi Divarı layihəsinin ideyası yarandı. Sonradan da 511 plitədən 10 metr eni və 4 metr hündürlüklü divar quruldu.
Divar yaranan kimi çox böyük məşhurluq qazandı. Müqəddəs Valentin günü burada ağ göyərçinləri buraxırlar, digər günlərdə isə yalnız quşların səsi ilə pozulan sakitlikdən həzz ala bilərsiniz.
Məkanından asılı olmayaraq, hər zaman sevgi ilə qalın… 🙂
